MANILA, Philippines - Dead-on-the-spot ang isang 32-anyos na lalaki na pinaniniwalaang itinumba kaugnay sa iligal na droga sa Parola Compound sa Tondo, Maynila, kahapon ng umaga.
Kinilala ang biktimang si Jojo Pradas, residente ng Damayan Lagi, E. Rodriguez, Quezon City.
Hindi pa tukoy ng mga awtoridad ang suspek sa krimen.
Sa ulat ni SPO2 Jonathan Bautista ng Manila Police District-Homicide Section, dakong alas-11:00 ng umaga, nang maganap ang krimen sa Area-H, Gate 64 Parola Compound,Tondo, Maynila.
Sa imbestigasyon, habang naglalakad ang biktima ay hinatak umano ang kuwintas na suot nito at saka malapitang binaril sa ulo na lumabas sa noo ng hindi kilalang suspect.
Kahit bumulagta na ito sa kalye ay muli pa itong pinaputukan sa ulo at likod ng katawan bago tuluyang tumakas ang salarin.
Sa nakalap na impormasyon ng imbestigador, ang biktima ay madalas na dumayo sa lugar at tumutuloy pansamantala sa isang alyas “Jocelyn” ng dalawa hanggang 3 araw.
May impormasyon din umano na may nadispalko o hindi nai-remit na pera para sa shabu ang biktima.
Posibleng sa galit ng ilang malalaking tulak sa lugar ay inabangan ang pagbabalik ng biktima upang ito ay patayin.
Gayunman, patuloy pa ring iniimbestigahan ang insidente.