MANILA, Philippines - Isang M33 fragmentation grenade ang natagpuan sa isang park makaraang paglaruan ng isang bata sa lungsod Quezon, kahapon ng umaga.
Ayon kay Inspectyor Noel Sublay, hepe ng Quezon City Police-Explosive Ordnance Division, isang malakas na uri ng granada ang M33 na maaring makapinsala sa maraming tao kung sumabog.
Sa inisyal na imbestigasyon, alas-8 ng umaga nang marekober ng Police Station 10 ang granada makaraang isuko ito ng isang babae na nangangalkal ng basura.
Ayon sa babae, nakita niyang pinaglalaruan ng batang lalaki ang granada sa Bernardo Park sa Kamuning at sa takot na sumabog ito ay kinuha niya at kusang dinala sa nasabing himpilan ng pulisya. Inaalam ngayon ng awtoridad kung papaano napunta sa lugar ang granada at kung sino ang naglagay nito sa nasabing park.