Coed na Koreana nanlaban sa snatcher, suspek timbog

MANILA, Philippines - Arestado ang isang kawatan makaraang manlaban ang isang Koreana na  estudyante ng  College of St. Benilde-De La Salle na kanyang inagawan ng cellphone, kamakalawa ng gabi sa Taft Ave. Manila.

Nakakulong ngayon sa Manila Police District-General Assignment and Investigation Section (MPD-GAIS) ang suspect na si  Francisco Antonio, 34, ng Malate,Maynila matapos ireklamo  ng biktimang si  Youn Su Kum, 18 , ng  Malate,Maynila.

Ayon kay P/Chief Insp. Arsenio Riparip, hepe ng MPD-GAIS, naganap ang insidente dakong alas-9:30 ng gabi habang nakatayo ang biktima sa harap ng DLSU gate at hawak ang kanyang cellphone na Samsung S4 nang bigla itong hablutin ng suspek.

Nanlaban umano ang biktima na nakatawag ng atensiyon sa mga guwardiya na siyang humabol sa suspek  hanggang sa naaresto. Katwiran  naman ng suspek, manganganak ang kanyang asawa at caesarian kaya’t kailangan niya ang  panggastos sa hospital.

Itinurn-over ng mga Security guard na sina  William Bautista at Rodrigo Golfo ang suspek sa MPD-Police Station 9 na siyang nagdala  sa MPD-GAIS.