MANILA, Philippines - Tuluyan nang namahinga ang isang 40-anyos na lalaki nang pasukin ito sa kaniyang silid ng kapitbahay at pagbabarilin, bago iniwang walang buhay sa Paco, Maynila, kamakalawa ng hapon.
Namatay mismo sa kaniyang kuwarto ang biktimang si Michael Flores, miyembro ng Sputnik Gang at residente ng B Int.4 Antonio Isip St. Paco, Maynila sanhi ng tama ng baril sa iba’t ibang bahagi ng katawan.
Testigo naman sa insidente ang live-in partner ng biktima na kinilalang si Rowena Patalita, 36, na nagsabing ang responsable sa pamamaril ay ang kapitbahay na si Richard Burgos, alyas “Richard Pilay” ng Paco, Maynila na mabilis na tumakas sakay ang kanyang kulay gray na Mitsubishi Lancer (SEW 446).
Sa ulat ni PO3 Alonzo Layugan ng Manila Police District-Homicide Section, dakong alas- 5:00 ng hapon ng maganap ang insidente sa kuwarto ng biktima.
Sinabi ni Patalita na nakaupo siya sa hagdanan ng kanilang bahay nang dumating ang suspect at hinanap ang kanyang live-in partner at sinabi niyang puntahan na lamang ito sa kuwarto.
Kasunod nito ay nakarinig na si Patalita ng mga putok ng baril at nang kanyang tunguhin ang silid ng ka-live in ay dito niya nakitang duguan na ito at nakahandusay.
Patuloy ang isinasagawang imbestigasyon ng pulisya sa motibo sa pagpatay.