Total truck ban sa EDSA inumpisahan na
MANILA, Philippines - Inumpisahan na kahapon ng Metropolitan Manila Development Authority (MMDA) ang implementasyon ng “total truck ban” sa kahabaan ng EDSA upang makatulong sa pagpapaluwag sa daloy ng trapiko.
Nilinaw ni MMDA Chairman Francis Tolentino na wala nang window hours na ipinatutupad sa kahabaan ng EDSA simula Lunes hanggang Linggo.
Bahagi umano ang total truck ban sa EDSA ng “modified truck ban” na inaprubahan ng Special Traffic Committee ng Metro Manila Council noong Disyembre 3.
“We no longer have window hours for trucks passing through EDSA. Trucks with a gross weight of 4,500 kilograms and above are not allowed in any portion of EDSA 24 hours a day, seven days a week,” ayon kay Tolentino.
Dahil dito, pansamantalang hindi muna ipatutupad sa Disyembre 7 hanggang Enero 6, 2013 ang lumang truck ban na pinapayagan ang mga trak sa EDSA simula alas-9 ng gabi hanggang alas-6 ng madaling-araw.
Sinabi ni MMC-STC chairman, Quezon City Mayor Herbert Bautista na ito ay upang makatulong sa pagpapaluwag ng trapiko sa EDSA na napakatindi na ang nararanasang dulot ng pagdami ng sasakyan sa Kapaskuhan.
Hindi naman kabilang sa truck ban ang mga trak na may lulang mga produktong nasisira o napapanis tulad ng pagkain, gulay, prutas at iba pa.
- Latest
