Bato handang ­magpaaresto sa ICC

MANILA, Philippines — Hindi manlalaban at handang magpaaresto si Sen. Ronald “Bato” Dela Rosa sakaling maglabas ng warrant of arrest ang International Criminal Court (ICC) laban sa kanya.

Sa panayam sa telepono, sinabi ni Dela Rosa na naawa siya kay dating Pangulong Rodrigo Duterte ng hulihin ito at dalhin sa The Hague upang harapin ang kasong “crime against humanity” dahil sa kanyang kampanya laban sa ilegal na droga noong nakaupo pa siya sa Malacañang.

Ipinahiwatig ni Dela Rosa na hindi siya magtatago at gagamitin ang lahat ng legal na paraan pero kung hindi ito umubra ay sasama na lang siya kay Duterte sa The Hague upang maalagaan ang dating Pangulo.

Sinabi rin ni Dela Rosa na siya ang naatasan na mag-asikaso ng mga dokumentong inihain sa Supreme Court kamakalawa na naglalayong pigilan ang paghuli ng ICC kay Duterte sa pamamagitan ng paghingi ng temporary restraining order (TRO).

“Magpapaaresto ako. Kapag may arrest warrant na. Paano ako entertain nila doon kung wala ko? Hindi ko papasukin. So kung meron, ready ako. Alagaan ko si Pangulo,” ani Dela Rosa.