‘Polvoron’ video ni Marcos ‘deepfake’ - AI experts
MANILA, Philippines — Napatunayan na ng mga eksperto sa digital media at artificial intelligence (AI) na fake ang kumalat na video noong Hulyo kung saan sumisinghot umano ng ilegal na droga si Pangulong Ferdinand Marcos Jr.
Sinabi ng AI experts mula sa Deepfakes Analysis Unit (DAU) na isang India-based Misinformation Combat Alliance, na ang video na kumalat bago ang ikatlong SONA ng Pangulo ay malawakang minanipula para magmukha na si Marcos ang nasa video.
Ang resulta ng DAU ay bineripika rin ng Vera Files na isang independent social media unit at isa sa nangungunang fact-checkers sa bansa.
Dahil dito, ayon kay Presidential Communications (PCO) acting Secretary Cesar Chavez, na vindicated na si Pangulong Marcos mula sa mga malisyosong indibidwal na nagnanais na siraan ang presidente at maging ang kanyang pagkatao.
Ang naturang video ay pinadala aniya sa India based misinformation advocate kaya nadiskubre ang mga bakas ng malawak na manipulasyon sa sinasabing “polvoron video”.
Sa pamamagitan aniya ng paggamit ng tinatawag na SensityAI, nadiskubre ng DAU na ang “polvoron video” ay malisyoso at nagpapakita ng senyales ng manipulasyon na tinawag na “face swap”.
Gamit pa rin ang tool na tinatawag na HIVE, nadiskubre rin ang manipulasyon sa run time sa video kung saan ang “no deepfake” at ang deepfake manipulation ay nag-overlapped.
Matatandaan na itinanggi na noong Hulyo 23 ng Philippine National Police (PNP) at National Bureau of Investigation (NBI) na tunay ang naturang video.
- Latest
