Alice Guo, nagpiyansa sa 2 counts ng graft

MANILA, Philippines — Nakapaglagak ng piyansa sa Valenzuela Regional Trial Court Branch 282 ang sinibak na Bamban, Tarlac mayor Alice Guo para sa dalawang count ng kasong graft na isinampa ng Department of the Interior and Local Government hinggil sa kanyang pagkakasangkot umano sa sinalakay na Philippine Offshore Ga­ming Operator (POGO) sa Bamban.

Kinatigan ni Valenzuela RTC Judge Elena Amigo Amano ang hirit na piyansa ng abogado ni Guo na si Atty. Stephen David bunsod na rin ng mga petisyon hinggil sa kustodiya ng dating alkalde.

Unang tinangka ni Atty. David na magkaroon ng status quo para manatili sa Philippine National Police (PNP) custodial facility si Guo dahil maituturing na high profile ang kaniyang kliyente.

Gayunman, sinabi ng korte na may letter request ang Quad Committee ng House of Representatives na kunin ang kustodiya Kay Guo dahil sa contempt order nito.

Bukas nakatakdang talakayin ng korte kung saan dapat na ikulong si Guo.

Kasalukuyang nakakulong si Guo sa PNP Custodial Center sa Camp Crame at nagpiyansa ng P540,000 Valenzuela City RTC Branch 282 matapos na iutos ng Ombudsman na triplehin ang P90,000 na piyansa.

Iginiit ng prosecution team ng Ombudsman na gawing triple ang piyansa dahil maituturing na high risk si Guo.

Samantala, tiniyak naman ni Bureau of Jail Management and Peno­logy (BJMP) spokesperson Chief Insp. Jayrex Busti­nera na handa ang kanilang mga jail facility maging sa Valenzuela o Pasig City Jail. Kailangan lamang aniya ang commitment order mula sa korte.

Magiging ordinaryong PDL din si Guo habang dinidinig ang kanyang kaso.