25 patay kay Ferdie, Gener, Helen, Igme, habagat

MANILA, Philippines — Umakyat na sa 25 katao ang iniulat na nasawi sa magkakasunod na bagyong Ferdie, Gener, Helen, Igme na pinalakas pa ng habagat.

Sa update ng National Disaster Risk Reduction and Management Council (NDRRMC) nitong Sabado, sa 25 na nasawi, 10 ay mula sa Mimaropa, lima sa Region 6, dalawa sa Region 7, apat sa Region 9, at apat sa BARMM.

Samantala, 13 ang iniulat na sugatan at walo ang nawawala.

Ayon pa sa NDRRMC, ang kalamidad ay nakaapekto sa 387,755 pamilya o katumbas ng 1,449,333 katao habang 5,783 pamilya o 23, 512 indibidwal ang pansamantalang nanuluyan sa 199 evacuation centers.

Naitala naman sa 122 kalsada at 14 tulay sa buong bansa ang naapektuhan habang ang pinsala sa agrikultura ay nasa P 600 milyon.

Patuloy namang nararanasan ang mga pag-ulan sa iba’t ibang bahagi ng bansa dulot ng southwest monsoon o habagat.