Bong Go, pinakahuwarang pilantropo, lider ng bansa
Gawad Agila Awards
MANILA, Philippines — Sa kauna-unahan nitong Gawad Agila Awards na idinaos sa Grand Ballroom ng Okada Manila, ginawaran ng Fraternal Order of Eagles - Philippine Eagles, Okada Elite Eagles Club si Senator Christopher “Bong” Go bilang “Most Exemplary Philanthropic Leader of the Nation.”
Sa kanyang video message, lubos na pinasalamatan ni Go ang fraternal organization sa pagsasabing ang naturang pagkilala ay lalong magpapalakas sa kanyang determinasyon na patuloy na walang sawang magtatrabaho para sa ikabubuti ng sambayanang Pilipino.
Tiniyak ng senador na mananatili siyang kampeon para sa kapakanan ng lahat at sa pagsusulong ng accessible na pangangalagang pangkalusugan ng mahihinang sektor.
Bilang tagapangulo ng Senate committee on health and demography, si Go ang nag-akda at nag-sponsor ng Republic Act No. 11463, mas kilala bilang Malasakit Centers Act of 2019, kaya may mga one-stop shop na nagbibigay ng mas maginhawang tulong medikal sa mahihirap na Pilipino.
Mayroon na ngayong 157 Malasakit Center sa buong bansa kung saan mahigit 7 milyong Pilipino ang natulungan na ng programa.
Bukod dito, patuloy na isinusulong ni Go ang pagtatayo ng mas maraming Super Health Center sa buong bansa na nagbibigay ng maginhawang access sa mga pangunahing serbisyong pangkalusugan.
Isa rin ang senador sa nagsulong ng iba pang batas, tulad ng Salary Standardization Law 5, expansion ng Solo Parents’ Welfare Act, Department of Migrant Workers Act, National Academy of Sports, at Bureau of Fire Protection Modernization Act, at iba pa.
- Latest
