Kaso ng pagpatay kay Degamo, iba pa maisasampa na sa korte sa Marso 30

MANILA, Philippines — Inaasahan ng Department of Justice (DOJ) na pormal nang maisasampa sa korte ang kaso ng pagpatay kay Negros Oriental Gov. Roel Degamo at sa iba pang mga biktima sa katapusan ng Marso.

“We think that it should be right for the filing hopefully by March 30 we can file these cases - March 30 o 31,” ayon kay Justice Se­cretary Jesus Crispin Remulla.

Kasunod ito ng pagsuko at pagkaaresto ng ilan sa mga suspek at inaasahang paglutang pa ng ibang mga sangkot sa krimen.

Nang tanungin naman kung kasama si Negros Oriental Rep. Arnolfo Teves Jr. sa mga kakasuhan, sinabi ni Remulla na hindi niya ito alam sa ngayon.

May hawak nang listahan ang DOJ sa mga posibleng suspek sa naturang pagpatay at may mga nadadagdag pa.  Patuloy naman ang pagkalap ng mga pro­secutors sa mga dagdag na ebidensya na magpapalakas sa kaso.

“We have a listing already - the initial list that we got was 17 people but there are more names coming up but as I said, we have to build up cases, we have to get the data, we have to investigate them syste­matically to get the necessary data,” paliwanag ng kalihim.

Kasama dito ang mga sinumpaang-salaysay ng mga saksi, mga suportang pahayag, death certificates, resulta ng awtopsiya, at iba pa.

Samantala, naniniwala si Remulla na may grupo o organisasyon sa Negros Oriental na nasa likod ng mga insidente ng pagpatay sa probinsiya at hindi rin aniya imposible na ito rin ang grupong nasa likod ng pagpatay kay Gov. Degamo.