MANILA, Philippines — Muling umarangkada ang Hugpong Para Kay Sara (HPS) o grupong nananawagan para tumakbo si Davao City Mayor Sara Duterte sa Panguluhan nang manumpa ang mga kilalang politiko ng Pangasinan bilang kasapi ng grupo sa isang oath-taking na isiginawa sa WCC Aeronautical and Technological College.
Sa isang show of force na naglalayong kumbinsihin ang reluctant presidential frontrunner na magbago ng isip, nagpahayag ng suporta ang lokal na HPS chapter mula sa 44 na munisipalidad at apat na siyudad sa Pangasinan para maipagpatuloy ni Mayor Sara ang mga matagumpay na programa ni Pangulong Rodrigo Duterte at maging ang sarili nitong programa.
Naunang nagdeklara si Mayor Sara na hindi na siya tatakbo sa Panguluhan matapos tanggapin ng kanyang ama ang alok na tumakbo itong bise-presidente.
Pinangunahan ang mass oath-taking ni newly-inducted HPS Pangasinan chapter officials at Bayambang Mayor Cezar T. Quiambao, president; Binalonan mayor Ramon Guico, Jr., VP for finance; Vici Ventanilla, VP for operations; Von Mark Mendoza, VP for external affairs; at Darwina Sampang, secretary at spokesperson.
Sinabi ni HPS national chairman at dating Davao del Norte Gov. Anthony del Rosario, umaasang tatakbo si Mayor Sara sa Panguluhan, na “once she sees the growing groundswell of support for her leadership happening all over the country.”
Pinuri naman ni Guico, tatakbong gobernador ng Pangasinan, ang mahusay na liderato ni Sara.
Sa kanyang parte, kinilala naman Quiambao ang prinsipyadong liderato ni Sara pagdating sa malalaking desisyon para sa kapakinabangan ng kanyang constituents.