MANILA, Philippines — Umapela ang isang kongresista sa mga lider ng political parties na hayaan silang pumili ng bagong ihahalal na Speaker ng 18th Congress.
Ayon kay re-elected Bulacan Rep. Rida Robes, dapat hayaan silang bumoto na naaayon sa kanilang konsensya at hayaang umiral ang demokrasya sa Kamara para sa bagong Speaker na siyang tunay na representante ng sambayanang Filipino.
Paliwanag pa niya, hindi naman kailangang sundin ang dikta ng mga party leaders bilang pagsunod na rin sa kanilang constituents na bumoto sa kanila.
Maging gabay rin umano ng mga kongresista sa pagboto sa susunod na Speaker ang sinabi ni Pangulong Manuel Quezon: “My loyalty to my party ends where my loyalty to my country begins.”
Maaaring ito rin umano ang dahilan kaya hindi nag-endorso si Pangulong Duterte kung sino ang dapat iboto na susunod na Speaker.