MANILA, Philippines — Sampal umano sa mahigit 10 milyong mahihirap na Pilipino ang pahayag ni National Economic Development Authority (NEDA) Undersecretary Rosemarie Edillon na ang NFA rice ay kalimitang pakain sa aso ng ilang mga Pinoy para makatipid sa gastusin.
Ayon kay National Food Authority-OIC Administrator Tomas Escarez, bukod sa insulto ito sa mahihirap na mamamayan at NFA employees na nangangalaga sa magandang kalidad ng bigas, ang pahayag ni Edillon ay hindi kaaya-ayang pakinggan mula sa isang mataas na opisyal ng pamahalaan.
Sinasabing napaka-unprofessional din ni Edillon sa pagma-matapobre na sabihin ito sa harap ng milyong mahihirap na mamamayan na kumakain ng murang bigas ng NFA.
Binigyang diin ni Escarez, hirap at buwis buhay ang nararanasan ng mga tauhan ng NFA para makarating lamang sa malalayo at mahihirap na lugar ang NFA rice hindi para ipakain ang suplay sa mga aso pero para sa mga taong kumakain ng abot kayang bigas na may mataas ding kalidad.