LPA nagbabantang pumasok sa PAR

MANILA, Philippines - Isang low pressure area (LPA) ang namataan kahapon ng PAGASA at posibleng pumasok sa Philippine area of responsibility (PAR) sa darating na Linggo.

Ayon kay Samuel Duran, weather forecaster, malaki umano ang tsansa na maging ganap na bagyo ang naturang LPA sa mga susunod na araw.

Kung magiging bagyo, ito ay tatawaging “Betty” at magiging ika-2 bagyo na papasok sa bansa ngayong 2015.

Kahapon, patuloy naman ang pag-iral ng hanging amihan sa Luzon kasama na ang Metro Manila at tail-end ng cold front sa Visayas, Mindanao area kung saan ang mga lugar na ito ay makakaranas ng maulap na kalangitan na may minsang pag-ulan.