MANILA, Philippines - Hanggang Miyerkules pa mananatili sa Philippine Heart Center (PHC) si Atty. Gigi Reyes, kapwa akusado ni Sen. Juan Ponce Enrile sa pork barrel scam, dahil sa mga test na gagawin dito ng kanyang mga doctor.
Ayon kay Insp. Aries Villaester ng Bureau of Jail Management and Penology (BJMP), Lunes pa umano ang isasagawang test at monitoring sa ginang at inaasahang mailalabas ng PHC ang medical abstract ni Reyes sa Miyerkules o Huwebes.
Ang medical abstract ni Reyes ang makapagsasabi anya kung dapat bang manatili ito sa ospital o hindi.
Sa kasalukuyan, nagpapahinga umano si Reyes sa tila ordinaryong kwarto ng ospital ngunit iginiit ng BJMP na intensive care unit (ICU) ito.
Nakakaranas pa anya si Reyes ng pagkahilo at may mga wire pang nakakabit sa katawan nito na konektado sa monitoring equipment.
Linggo ng umaga nang sumailalim si Reyes sa electrocardiogram (ECG) upang malaman ang kalagayan ng puso nito matapos umanong manikip ang dibdib at hirap sa paghinga.
Una nang sinabi ni Villaester na Sabado pa lang ay inaabangan na nito ang paglabas ng medical abstract ng PHC.