Kahit may gun ban PNP kinastigo sa sunud-sunod na barilan

MANILA, Philippines - Pinagpapaliwanag ng oposisyon sa Kamara ang Philippine National Police (PNP) dahil sa sunod-sunod na insi­dente ng pamamaril habang nasa kalagitnaan ng gun ban para sa 2013 elections.

Ayon kay House Minority leader Danilo Sua­rez at Deputy Mino­rity Leader Milagros Mag­saysay, lubhang nakakaalarma ang dami ng naitatalang barilan sa buong bansa.

Tanong ng mga mam­babatas, kung ano ang ginagawa ng mga otori­dad para lutasin ang problema sa mahigit ka­lahating milyong loose firearms.

Giit ng minorya, dapat na magsilbing wake-up call sa gobyerno ang  insidente ng Atimonan shootout, pamamaril ng isang Canadian sa loob ng courtroom sa Cebu at ang pamamaril kay Ma­conacon, Isabela Mayor Erlinda Domingo kamakalawa ng gabi sa Quezon City.

Idinagdag naman ni Magsaysay na dapat tu­tukan ni DILG Secretary Mar Roxas ang mga ahen­siya na nasa ilalim nito tulad ng PNP dahil nakakalungkot naman umanong isipin na mismong ang mga awtoridad pa ang lumalabag sa batas tulad ng mga pulis at sundalo na kasama sa Atimonan shooting.

Giit ni Magsaysay, da­pat na mag-concentrate si Roxas sa nasabing mga ahensiya at huwag tu­mutok sa 2016 elections.

Dahil dito kayat nana­wagan din ang mga mam­babatas sa admi­nis­trasyon na maging mas mahigpit sa pagpapatupad ng batas lalo pa nga­yon at nalalapit na ang eleksyon.