Firecracker zone giinspeksyon

CEBU, Philippines — Gi-inspeksyon sa Cebu City Police Office(CCPO) ug Regional Civil Security Unit(RCSU)-7 ug Bureau of Fire Protection -7 ang baligyaanag pabuto sa South Road Properties (SRP) kagahapon sa buntag.

Si Police Colonel Antonietto Cañete, City Director sa CCPO ang nangunay sa pagsusi sa firecracker zone sa SRP nga dunay 16 ka mga stalls.

Gitan-aw sa CCPO, RCSU-7 ug BFP ang gidak-on sa mga pabuto, ang mga gitugot lang nga ibaligya sa dapit apil na ang gipatumang safety measures sa lugar aron malikayan ang sunog.

Hinoon, nakita sa otoridad nga nituman ang mga mamaligyaay og pabuto sa lagda nga ilang gipagawas.

Mipahimangno si Cañete sa mga tawo nga ipatuman nila ang executive order sa mayor nga didto lang sa mga firecracker zone sa matag barangay mahimong tugutan nga makagamit og pabuto ang mga tawo.

Kadtong masakpan nga molapas sa balaod dakpon ug pasakaan og kaso.

Tinguha sa kapulisan nga wala'y mahitabong disgrasya apil na ang stray bullet case maong awhag niya sa tanan nga mya naghupot og armas nga mahimong responsable aron dili makaamong og kinabuhi sa tawo.

Pabuto sa SRP

Gihulagway sa mga manindahay og mga pabuto sa South Road Property kun SRP nga nakabawi-bawi sila sa ilang kita atol sa pagsugat sa Pasko, human ubay-ubay matod pa sa mga tawo ang namalit sa ilang mga produkto ilabi na pagkagabii sa December 24, 2024, hinoon gamay pa kini og wala makatarog sa mga supply nga naa sa maong dapit.

Apan gilauman nila nga  modaghan ang mamalit kanila karong pagsugat sa bag-ong tuig ug dako ilang panghinaut nga makaginansya.

Ang mga manindahay nibutyag nga sa nilabay nga tuig naalkansi sila sa ilang mga paninda human wala paagii ang SRP tungod sa countdown nga gipahigayon kaniadto.

Ang mga manindahay subling naneguro nga kadtong luwas ra nga pabuto ang ilang mga gipamaligya.

Nagpabuto’g Armas

Sa pikas bahin, mas gihugtan pa sa kapolisan  sa Lapu-Lapu City Police Office (LCPO) ang ilang mga pahimangno nga likayan ang pagpaboto og armas karong pagsugat sa Bag-ong Tuig.

Si Police Lieutenant Colonrel Christian Torres, tigpamaba sa LCPO  nga nahinabi sa mga tigbalita miingon nga kadtong barangay tanod sa Basak nga nagpabuto og armas didto gyud namasko sa bilanggoan.

Nasakmit sa mga sakop sa Special Weapon and Tactics (SWAT) gikan sa maong tanod ang kalibre .38 revolver ug usa ka .9mm caliber revolver nga walay serial number uban sa napulo ka mga bala ug duha ka mga kabhang niini.

Gitataw ni Torres nga wala maaktohi sa mga SWAT ang iyang pagpaboto apan adunay tawo nga nakakita og maoy nagtaho ngadto sa kapolisan bahin sa pagpabuto niini og armas.

Si Torres miingon nga ang kaso nga kalapasan sa Republic Act 10591 o Comprehensive Firearms and Ammunition Regulation Act ang ipasaka batok sa maong tanod.

Way Firecracker Zone

Sa laing bahin, usa ra ka tindahan ang naka apply og permit sa Dakbayan sa Talisay nga makabaligya og pyro techniques sumala pa ni Chief Insp. Alvin Torion, hepe sa kabumberohan sa siyudad.

Gipahibalo sab niya nga ang lokal nga kagamhanan walay nakita nga lugar nga haom aron ideklarar nga firecracker zone mao nga walay gitugotang makabaligya og pabuto sa siyudad.

Kadtong magtago-tago sa pagpamaligya niini makalapas gyud sa balaod ug mahimong masilotan.

Ang kapolisan sa Dakbayan sa Talisay pinangulohan ni Police Lt. Col. Epream Paguyod nagsuroy-suroy sa pagmonitor nga aduna bay namaligya og pabuto.

Atol sa pagsugat sa Pasko  adunay 600 ka mga pabuto ang ilang gisakmit. Romeo Limpangog ug Gabriel Bonjoc/IBM BANAT NEWS