Mama ug anak giluba sa ‘milugos’ sa 8-anyos

CEBU, Philippines - Kritikal ang usa ka 38-anyos nga inahan ug ang 12-anyos nga anak niining lalaki human sila gitusaktusak og dunggab sa silingan kagahapon sa alas 12:45 sa hapon sa barangay Kalangkang lungsod sa Badian.

Ang biktimang ginang (pangalan gipugngan) nakaangkon og mga samad dinunggaban sa lain-laing parti sa iyang lawas samtang ang anak niining lalaki nakaangkon og samad dinunggaban sa walang bahin nga abaga ug walang bahin nga hawak, ang duha nalandig sa Vicente Sotto Memorial Medical Center.

Ang suspetsadong si Zenon Sayaboc, 55, nadakpan sa grupo ni Insp. Rico Romanguera samtang padulong moikyas luwan sa usa ka bus diha sa dakbayan sa Carcar paingon unta sa dakbayan sa Sugbo.

Si Romanguera nga nahinabi sa Banat News mibutyag nga si Sayaboc suspetsado kini sa paglugos sa 8-anyos nga anak nga babaye sa ginang niadtong Nobiyembre 5, 2012.

Apan ang inahan ug anak misumbong niadto rang Nobiyembre 19, 2012 ug kagahapon gihuwat unta ang duha nga mobalik sa ilang buhatan alang sa paghikay sa kasong rape nga ipasaka batok sa suspek apan mao na kini hinuon ang nahitabo sa mga biktima.

Sumala pang Romanguera gisulong pa sa suspek ang panimalay sa mga biktima ug gisukmatan bahin sa pasangil nga gilugos niini ang anak sa ginang, tungod sa kasuko gihansakan ni Sayaboc og plamingko ang anak nga lalaki sa ginang ug sa pagtabon sa inahan gihansakan usab kini makadaghang higayon.

Inabagan sa kapolisan sa Carcar gibabagan ang bus nga gisakyan sa suspek hinungdan sa pagkasikop niini. (BANAT NEWS)