Paalam abante sa quarterfinals: Apan Bacyadan napakyas sa iyang Olympics debut
CEBU, Philippines — Ang pambato sa Pilipinas nga si Carlo Paalam mipukan ni Jude Gallagher sa Ireland pinaagi sa unanimous decision aron pag-angkon og luna sa quarterfinals sa men’s 57kg category sa boxing event sa Paris Olympics didto sa France.
Upat sa lima ka mga judges parehong mi-iskor og 29-28, samtang ang laing usa mitali og 30-27 tanan pabor ni Paalaam, nga nanginahanglan og usa na lang ka daog aron pagseguro sa iyang kaugalingon og medalya.
Sa miaging Olympics tulo ka tuig na ang milabay didto sa Tokyo, si Palaam nakapugnit og silver medal.
Ang 26-anyos nga garbo sa Bukidnon migamit sa iyang kaabtik ug agresibong ataki aron bihagon ang Irish niyang kontra nga mas taas kaniya og tulo ka pulgada.
Si Paalam mo-away sunod karong Sabado, Agosto 3, sa alas 9:46 sa gabii.
Kon ugaling modaog, hayan nga segurado na siyang makabitbit og bronze
Dili hinoon tanan pagmaya ang nasinati sa mga Pinoy gumikan kay si Hergie Bacyadan napakyas sa iyang debut sa prestihiyosong torneyo nga mahitabo kausa lamang sud sa upat ka tuig.
Si Bacyadan nanamilit human gibuntog ni Chinese top seed Li Qian pinaagi unanimous decision sa ilang sangka sa round of 16 sa women's 75kg division.
Ang tanang lima ka judges mi-iskor og 30-27 alang sa inilog nga si Li, nga gold medal na karon ang tirada human naka-bronze sa 2016 Rio Olympics ug mibira og silver sa 2020 Tokyo Games. (BANAT NEWS)
- Latest
