5150 Dapitan Triathlon sugbuanong si Hermosa gikoronahang overall champion sa men's division

CEBU, Philippines — Nahimong halandumon ang 5150 debut saa Sugbuanong triathlete nga si Matthew Justine Hermosa human siya gibayaw nga men's overall champion sa malampuson nga ikaduhang edisyon sa 5150 Dapitan Triathlon didto sa Zamboanga del Norte kagahapong adlawa.

Unang mihaw-as sa 1.5-kilometer open water swim nga iyang gihuman sud sa 17 minutos ug 56 segundos, si Hermosa nakasustinir sa iyang kainit diin siya mipatak og 1:00:21 sa 40km bike ug 37:16 sa 10km run dayon ngadto sa pagsakmit sa titulo uban ang kinatibuk-ang oras nga 1:56:56.

“This was my first time competing in 5150, and I’m proud to have won,” matud pa ni Hermosa. “My goal has always been to make the Hermosa name known in triathlon, and this is a step toward that.”

Ang 18-anyos nga garbo sa dakbayan sa Talisay nakalahutay bisan nakahiagum og cramps sa katapusang hunat sa dagan aron lupigon ang labing sikit niyang karibal nga si Satar Salem, ang bitoon sa SND Tri Barracuda nga mipahiluna sa ikaduhang dapit sa oras nga 1:58:57. Si Dayshaun Ramos nalandig sa ikatulong puwesto sa oras nga 2:01:45.

“The key was to never give up,” dugang pa ni Hermosa nga mao sab ang nanghawod sa men's 15-19 age group. “Satar was right behind me the entire time, which kept me pushing harder.” Sa women's division, si Nicole Andaya sa Usuals team ang gikoronahang rayna sa oras nga 2:36:00.

Labaw siya og kapin sa tulo ka minuto ni Joanne Cruz sa Tri SND Barracuda, nga maoy miangkon sa ikaduhang luna sa oras nga 2:39:59. Si     Lourdes Ramos ang na-3rd sa oras nga 2:40:05.

Nadungagan pa ang selebrasyon nilang Hermosa ug Andaya gumikan kay gitunolan sa man sab sila sa prestihiyosong Bagong Bayani awards kauban sila si Paul Jumamil ug Nicole Del Rosario.   

“Racing in Dapitan makes you think about our history, especially Rizal’s legacy. I’m grateful for this honor,” padayag pa ni Hermosa, nga sa kinatibuk-an mibulsa og P65,000 nga ganting salapi luyo sa dominante niyang performance ning makatus nga lumba nga giorganisa sa Ironman Group inabagan sa Dapitan LGU nga gipagulohan ni Mayor Seth Frederick “Bullet” Jalosjos.