Petecio miabante sa sunod nga hugna, marcial natagak

CEBU, Philippines — Nakasinati og managlahing kapalaran ang duha ka mga pambato sa Pilinas sa boxing event sa  Paris Olympics nga sila si Nesthy Petecio ug Eumir Marcial.

Si Petecio misikad sa iyang kampanya pinaagi sa impresibong kadaogan batok ni Jaismine Lamboria sa India sa women’s 57kg category.

Gamit ang iyang kaabtik ug dalaygon nga footwork, gidominar ni Petecio ang 5-foot-9 nga Indian sa tibuok nga bahin sa tulo ka hugna nilang sinukmagay.

Tungod niini, nakuha sa 32-anyos nga si  Petecio ang impresyon sa lima ka mga judges.

Tungod niini, si Petecio mi-abante sa round of 16 diin iyang sangkaon ang garbo sa host France nga si Amina Zidani sa alas-2 sa kaadlawon karong Sabado.

Samtang si Petecio naghudyaka, lahi nga estorya ang nahitabo ni Marcial gumikan kay ang Tokyo bronze medalist gibihag sa usa ka Uzbek debutant nga mipapha ang iyang damgo nga makamedalya.

Si Marcial natagak sa men’s 80 kilogram division human gipilde ni Turabek Khabibullaev sa Uzbekistan pinaagi sa unanimous decision.

Ang tanang lima ka judges mipabor sa Uzbek sa iskor nga 29-28 upat ka higayon ug 30-27.

Kay gihamok og injury, si Marcial naglisud pagpatupa sa iyang mga suntok ngadto sa Uzkek hinungdan sa mapait niyang kapakyasan.

Upat pa hinoon ka mga Pinoy ang dunay tsansa nga makamedalya sa boksing. Gawas ni Petecio, ang uban mao sila si Carlo Paalam, Hergie Bacyadan ug Aira Villegas.