MANILA, Philippines - Natagpuan na ang tatlo pang bangkay ng mga batang nalibing ng buhay sa landslide sa tumama sa isang barangay sa Kabasalan, Zamboang Sibugay.
Sinabi ni Senior Inspector Rico Pondol, hepe ng Kabasalan police office, na natagpuan ang bangkay ni Eugene Orong Maghanoy, 9, ilang metro ang layo sa pinangyarihan ng insidente nitong Martes.
Unang narekober ang bangkay ng kapatid ni Eugene na si Fatima Orong Maghanoy nitong Linggo ng umaga.
Kahapon ng hapon naman nabungkal ang wala nang buhay na katawan ng kanilang pinsan na sina Sherlyn Mae Lugatiman Maghanoy, 7, at kapatid nitong si Eziquel Meziah,3.
Magkayakap pa nang matagpuan ng mga awtoridad ang bangkay nina Sherlyn Mae at Eziquel.
Sinabi pa ni Pondol na naaagnas na ang katawan ng mga biktima nang matagpuan nito.
Sumilong ang mga biktima sa isang abandonadong bahay dahil sa lakas ng ulan ngunit tinabunan naman ito ng gumuhong lupa noong Mayo 28.