Bimby, pineke sa boyfriend!
![Bimby, pineke sa boyfriend!](https://media.philstar.com/photos/2024/08/22/kris-bimby_2024-08-22_23-24-14.jpg)
Hindi nakalusot sa fake news ang anak ni Kris Aquino na si Bimby. Ginawan ito ng intriga na diumano’y pag-amin tungkol sa boyfriend.
Hindi ito pinalagpas ni Ogie Diaz at ipinost nito ang screenshot ng post na may caption na “Fake News Again! Taas pa naman ng Following! FAKE!!”
Hindi lang kasi iyon ang ginawan ng fake news kundi marami pa ang ginawan ng account, na may pangalang Viral TV, ng fake news na pati sina Sandro Muhlach at Sen. Jinggoy Estrada ay naroon din.
Sa post ay may caption ito na sinasabing napaiyak daw ang nanay nila Joshua nang magbukas daw si Bimby tungkol sa boyfriend nito. Nagdulot pa raw ito ng emosyonal na reaksyon kay Kris, na nagsabi raw na mahalagang hakbang ito sa kanilang relasyon bilang pamilya.
Bagama’t masaya raw si Kris para sa anak, hindi raw maikakaila ang halo-halong emosyon na dulot ng mga bagong yugto sa buhay ng anak.
Sinabi pa ng nagkalat ng fake news na tinanggap daw ng publiko na may suporta at pang-unawa ang pag-uusap ng mag-ina.
Bukod nga sa imbentong kwento ay gumamit pa ito ng litrato ng dalawang lalakeng naghahalikan na may hawig sa bagets pero kung tititigan ay matanda na iyon.
Ang masama nga rito ay pinaniwalaan ito ng ibang netizens at malaki pa ang following ng page.
Mag-react kaya ang Queen of All Media na nakatutok pa sa kanyang pagpapagamot sa Amerika?
- Latest