Imago (55)

SA gitna ng nakatatakot na katahimikan, dahan-dahang humakbang ang pigura palayo sa pinto. Ngunit sa kanyang paggalaw, isang matinis na tunog ng bakal ang umalingaw­ngaw.

Klink.

Isang kumpol ng mga susi ang nahulog mula sa bulsa ng kaniyang jacket, bumagsak sa semento malapit sa paanan ng pinto, kalahating talampakan lamang mula sa natata­nging asul na liwanag na nagmumula sa silid. Hindi ito napansin ng lalaki. Patuloy siya sa paglalakad patungo sa kabilang dulo ng madilim na pasilyo, ang kaniyang mabibigat na yabag ay dahan-dahan na ring humihina.

Nakatitig si Maya sa kumpol ng susi sa sahig.

Alam niyang iyon na ang kanyang pinakamala­king pagkakataon. Ang mga susing iyon ang maaaring magbukas sa silid ni Nelson sa Sub-Level 2. Ngunit upang makuha ito, kailangan niyang lumabas mula sa anino at pumasok sa may liwanag, kung saan mabilis siyang makikita kung lilingon ang lalaki.

Pinagpawisan ang kanyang mga palad habang hawak ang pipe wrench. Pinalipas niya ang tatlong segundo hanggang sa mas lumayo pa ang yabag ng lalaki.

Sa isang mabilis at walang ingay na paggalaw, dumapa si Maya sa sahig. ­Inabot ng kanyang kanang kamay ang kumpol ng susi. Ang malamig na bakal ng mga susi ay agad niyang inipit sa bulsa upang hindi ito gumawa ng anumang kalansing.

Nakuha niya.

Mabilis siyang gumapang pabalik sa dilim bago paman makali­ngon ang anino sa dulo ng pasilyo. Hawak ang mga susi at ang kanyang armas, dahan-dahan siyang pumasok sa katabing daanan patungo sa hagdanan pababa. (Itutuloy)