4 sasakyan inararo ng trak: 1 patay

MANILA, Philippines — Patay ang isang 35-anyos lalaki habang dalawa pa ang sugatan matapos na araruhin ng truck ang apat na behikulo sa kahabaan ng San Mateo Road, Brgy. Batasan, Quezon City nitong Biyernes ng gabi.

Inaalam pa ng pulisya ang pagkakakilanlan ng nasawi, isinugod sa pagamutan ang dalawang sugatan.

Sa ulat ng Quezon City Police District, arestado naman ang driver ng cargo truck na si Ranilo Galabay, 46-anyos.

Bandang alas-10:30 ng gabi, habang ang dalawang SUVs, isang kotse at isang tricycle ay bumabagtas sa kahabaan ng San Mateo Road, Brgy. Batasan nang biglang salpukin ng cargo truck na minamaneho ni Galabay.

Lumalabas na unang binangga ng cargo truck ang isang kotse at sumunod ang SUV.  Tinangka ng driver ng truck na makontrol ang behikulong kaniyang minamaneho pero sa kamalasan ay nasalpok din nito ang isa pang SUV at tricycle na ikinasawi ng isa.