Daan-daang libong kostumer ng Meralco, nawalan ng suplay ng kuryente

MANILA, Philippines — Nakaranas ng power outage o pagkawala ng suplay ng kuryente sa kasagsagan ng pananalasa ng bagyong Kristine ang daan-daang libong kostumer ng Manila Electric Company (Meralco).

Ayon kay Meralco spokesperson Joe Zaldarriaga, dakong alas-8:00 ng umaga kahapon ay nasa 535,000 kostumer nila ang nawalan ng suplay ng kuryente.

Bumaba naman aniya ang naturang bilang sa 397,000 na lamang pagsapit ng alas-11:00 ng umaga.

Karamihan aniya sa mga naapektuhang kostumer ay mula sa Laguna, Cavite, Quezon Province, Batangas, Metro Manila, at Bulacan.

Naganap aniya ang pagkawala ng kuryente dahil sa malakas na hanging dala ng bagyo at mga pagbaha.