Tanod tinodas sa harap ng mag-ina
MANILA, Philippines - Namatay noon din ang isang 43-anyos na barangay tanod nang ito ay pagbabarilin ng hindi pa kilalang suspek sa harap ng kanyang mag-ina habang nanonood ng telebisyon sa kanilang bahay sa Barangay Bagong Ilog, sa Pasig City kahapon ng hapon.
Ang nasawi ay kinilalang si Ignacio Intalan, alyas ‘Onyok,’ ng Intalan Compound, sa A. Flores Street ng nasabing barangay.
Sa salaysay ng misis ng biktima, dakong alas-2:00 ng hapon ay katabi nila ng kanyang anak ang biktima sa upuan habang nanonood ng telebisyon nang bigla na lang nagpaputok ng baril ang mga hindi pa kilalang suspek sa labas ng kanilang bakuran.
Pagkatapos ay pumasok ang mga ito sa loob ng kanilang compound at nasaksihan ng misis ang pagmamakaawa ng kanyang mister na huwag siyang patayin, ngunit hindi ito pinakinggan at itinuloy ang pagbaril.
Bigo ang ginang na makilala ang suspek na nakasuot umano ng bonnet at hood.
- Latest
