MANILA, Philippines – Isang lider ng porter sa Balintawak market ang nasawi nang ito ay barilin sa sentido ng kanyang kasama kahapon sa Quezon City.
Ang nasawi ay kinilalang si Joel Bulan, 41, may-asawa at stay-in sa MGP Market na matatagpuan sa 1165 Edsa, Brgy. Apolonio Samson, Balintawak sa lungsod.
Ang suspek na tumakas ay kinilalang si alyas Bato, porter sa MC Market.
Batay sa ulat, ganap na alas 11:30 ng umaga ay naglalaro ang biktima sa isang computer shop nang ito ay lapitan ng suspek at walang kaabog-abog na binaril nang malapitan sa sentido.
Tumakas ang suspek nang matiyak na patay na ang biktima.
Ang MC market sa Balintawak ang isa sa walong kontrobersyal na palengke na planong ipasara ng lokal na pamahalaan dahil sa maraming paglabag kabilang na ang kalinisan.