MANILA, Philippines – Napatay sa saksak ang isang magsasaka ng kanyang sariling misis makaraang magtalo tungkol sa kawalan ng pambili ng pagkain sa media noche kamakalawa ng umaga sa Purok 5, Barangay Mamala 2 sa bayan ng Sariaya, Quezon.
Hindi na umabot ng buhay sa Lucena United Doctors Hospital sanhi ng malalim na saksak sa kaliwang dibdib ang biktimang si Rodante San Vicente, 33, habang naaresto naman at nakapiit na ngayon sa municipal jail at nahaharap sa kasong parricide ang suspek na si Laarni San Vicente, 28.
Sa imbestigasyon ng pulisya, dakong alas-7 ng umaga ay sumiklab ang mainitang pagtatalo ng mag-asawa tungkol sa kawalan ng perang ipambibili ng kanilang ihahanda sa media noche.
Sa gitna ng pagtatalo ay iginiit ng mister na pagtiyagaan na lamang nila ang mga gulay at prutas sa kanilang bakuran na bagay namang ikinagalit ng misis.
Kumuha ng itak na may habang 18-pulgada ang mister upang takutin ang asawa subali’t naagaw sa kanya ng misis at ipinangsaksak sa kanya.