MANILA, Philippines - Naghain kahapon ng bagong petisyon sa Commission on Elections (Comelec) si Rizalito David na kumukuwestyon sa legalidad ng kandidatura ni Davao City Mayor Rodrigo Duterte sa pagkapangulo.
Si David ay siya ring naghain ng disqualification case laban kay Senador Grace Poe sa Senate Electoral Tribunal o SET.
Sa siyam na pahinang petisyon, hiniling ni David na ideklara ng Comelec na ang substitution ni Duterte kay Martin Dino bilang pambato sa pagkapangulo ng Partido PDP-Laban ay walang bisa at dapat lamang umano na makansela ang COC ni Duterte.
Malinaw anya na ang COC ni Duterte ay inihain lagpas na ang deadline para sa pagsusumite ng COC na itinakda nuong October 16, 2015.
Idinagdag pa ni David na ang ginawang pag-atras ni Dino sa kanyang kandidatura ay pagpapaikot sa Comelec Rules of Procedure.