OLONGAPO CITY, Philippines – Nagkaloob ng maagang pamasko ang power distributor na Olongapo Electricity Distribution Co., Inc. (OEDC) at ang San Miguel Energy Corporation (SBEC) sa mga residente ng lungsod na ginanap sa Rizal Triangle dito.
Ang nabanggit na gawain na may titulong “Pamaskong Handog ng San Miguel Energy Corporation at OEDC Para sa Olongapeño” ay naglalayong magkaloob ng libreng medical at dental services sa mga higit na nangangailangang residente ng lungsod.
Ayon kay OEDC Vice-President Pacita Chavenia Gabriel, ang proyekto ay nakapagkaloob ng libreng serbisyo sa mahigit na 1,000 pasyente na inirekomenda ng mga punong barangay mula sa 16 na barangay ng lungsod.
Maliban sa serbisyo, nagkaloob din ng mga bitamina at kinakailangang gamot para sa mga pasyente.
Ang OEDC ay ang suplayer ng kuryente sa Olongapo City na nagsimula ng operasyon nang nakaraang taon lamang at nakapagsagawa na ng kinakailangang rehabilitasyon sa buong sistema ng kuryente sa lungsod upang maibigay ang mataas na kalidad ng serbisyo ng kompanya.