MANILA, Philippines - Ipinakita ng isang 48-anyos na ama ang pagmamahal nito sa kanyang anak nang saluhin nito ang saksak mula sa kaaway nito kamakalawa ng gabi sa Sta. Cruz, Maynila.
Ang biktima na namatay dahil sa tinamong saksak sa likod habang nilalapatan ng lunas sa Jose Reyes Memorial Medical Center (JRMMC) ay kinilalang si Edgar Arceo, ng 1450 Lope de Vega St., Sta Cruz, Maynila.
Ang suspek na tumakas ay kinilalang si Jerick De Leon, 20, fish ball vendor at residente rin sa lugar.
Batay sa ulat, bago nangyari ang insidente dakong alas-8:00 ng gabi sa tapat ng tindahan ng biktima sa panulukan ng T. Alonzo at Lope De Vega Sts., Sta Cruz, Manila ay inakusahan ang anak ng biktima na si Erwin Bumalay, 18, ng ama ng suspek na nagnakaw ng gulong ng kanilang tricycle.
Itinanggi ni Erwin ang akusasyon, subalit dumating ang suspek at kapatid nitong si Jason ay walang sabi-sabing sinuntok.
Inawat ng biktima ang suspek at sa pag-aakalang ayos na ay tumambay sila sa harapan ng kanilang bahay.
Ilang sandali ay dumating ang suspek at nang sasaksakin si Erwin ay sinalo ito ng ama na tinamaan sa likod.