Factory worker at bisor binoga sa mukha, todas

MANILA, Philippines - “Bantayan mo ang asawa mo, baka wala nang malay pag umuwi sa’yo, sakit na lang ang ipapalit ko sa’yo”.

Ito ang natanggap na text messages ng isang misis bago pagbabarilin at mapatay ang kanyang mister kahapon ng umaga sa Malabon City.

Ang biktima na namatay noon din dahil sa tama ng bala ng kalibre 45 sa mukha at ulo ay nakilalang si Jover Barruga “alyas Lapad”, 35-anyos, may-asawa, residente ng Magsaysay St., Barangay  San Agustin ng lungsod.

Batay sa ulat, dakong alas-5:30 ng umaga ay sakay ang biktima ng kanyang motorsiklo sa tapat ng bahay at naghahanda nang pumasok sa trabaho nang bigla na lamang sumulpot ang suspek na nakamotor at pinag­ba­ba­ril ito.

Wala pang pagkakakilanlan ang suspek na mabilis na tumakas at hindi naplakahan ang motorsiklo.

Samantala hindi na umabot ng buhay sa ospital ang biktimang si German Lorica, 46, residente ng Guevarra St., Barangay Maharlika Village, supervisor ng South Luzon Expressway (SLEX) matapos itong barilin nang malapitan sa mukha ng hindi pa kilalang suspek habang naglalakad papasok sa kanyang trabaho kahapon ng alas-5:20 ng umaga sa panulukan ng Barrameda at Madelo Sts., Purok 4, Barangay Lower Bicutan, Taguig City.