Kandidatong mayor nilikida ng tandem

MANILA, Philippines - Pinagbabaril ng ri­ding-in-tandem suspek ang isang barangay chairman na tu­matakbong mayor habang ito ay nakatayo sa tapat ng bahay ng kapitbahay kahapon ng tanghali sa Brgy. Fortuna, Marcos, Ilocos Norte.

Ang biktima na namatay noon din dahil sa mga tama ng bala sa ibat ibang bahagi ng katawan ay nakilalang si Alfredo Arce, Brgy. Chairman sa naturang lugar at mayoralty candidate ng nasabing bayan.

Nasugatan naman ang dalawang bystander na tinamaan ng ligaw na bala na kinilalang sina Apple Joy Joaquin, 21-anyos, da­laga at Karlajayan Agus­tin, 5-anyos na gina­gamot sa Sta. Teresita Hospital sa nasabing bayan.

Batay sa ulat, ala-1:30 ng hapon habang nakatayo si Arce sa harapan ng bahay ng pamilya Macatiag sa kanilang barangay ay biglang sumulpot ang riding-in-tandem at pagba­barilin ito.

Mabilis namang tuma­kas ang mga salarin patu­ngo sa hindi pa malamang destinasyon matapos ang insidente.

Pinaniniwalaan namang may kinalaman sa pu­litika kaugnay ng midterm election sa Mayo ng taong ito ang krimen habang patuloy ang imbes­tigasyon sa kaso.