MANILA, Philippines - Tatlo na katao kabilang ang dalawang bata na sakay ng isang kotse ang tinutukan ng baril ng isang lalaki na nagpakilalang pulis matapos magkaroon ng gitgitan sa kahabaan ng Molino Road, Bacoor City, Cavite kamakalawa.
Sa reklamong inihain na itinago sa alyas Sherwin, nasa hustong gulang sa himpilan ng Bacoor Police, bandang alas-8:15 ng umaga habang minamaneho niya ang Honda Civic kasama ang dalawang kaanak at binabaybay ang kahabaan ng nasabing lugar para ihatid ang isang 7-anyos at isang binatilyo sa kanilang Christmas party.
Nang papaliko ay hinarang at ginitgit sila ng dalawang beses ng isang Ford Lynz 4DR Sedan (WPP 647) na sinasakyan ng suspek.
Hindi pa nakuntento ay bumaba ang suspek sa behikulo at nagpakilalang pulis sabay naglabas ng baril at tinutukan ang mga sakay ng kotse at pilit pa umanong kinukuha ang lisensya kay Sherwin.
Sa isinagawang beripikasyon sa LTO ay natukoy naman na ang nasabing behikulo ay nakapangalan sa Kenneth Aquamarine Products Inc na may address na 5856 Pelaez St., San Dionisio, Parañaque City.
Sa kasalukuyang, tinutugis na ng pulisya ang nasabing suspek.