MANILA, Philippines - Dedo ang isang miyembro ng New People’s Army (NPA) matapos makasagupa ang tropa ng militar sa Barangay Tagbuyacan, Santiago, Agusan Del Norte, kamakalawa ng umaga.
Ayon kay Lt. Col. Eugenio Julio Osias IV, tagapagsalita ng Philippine Army, ang sagupaan sa pagitan ng mga NPA at militar ay naganap dakong alas-8:58 ng umaga.
Hindi pa batid ang pangalan ng napatay na NPA na miyembro ng Guerilla Front 16 ng North Eastern Mindanao Regional Committee.
Ayon sa report, ang mga residente ng Cagayan De Oro City ang nagbigay ng impormasyon sa 4th Infantry Division ng Philippine Army sa presensya ng NPA sa kanilang lugar na gumagawa umano ng harassment at extortion.
Dahil sa sumbong, kaya agad na nagresponde ang 402nd Infantry Brigade sa lugar na nagbunsod upang magkaroon ng palitan ng putok na nagresulta ng pagkamatay ng biktima at tumakas ang iba niyang kasamahan.