MANILA, Philippines — Lumapit ng isang hakbang ang reigning champion TNT Tropang Giga mula sa misyong madepensahan ang korona matapos ang 81-79 panalo kontra sa Rain or Shine sa Game Four at maitayo ang 3-1 bentahe sa 2024 PBA Governors’ Cup semifinals series kahapon sa Smart Araneta Coliseum.
Isinalpak ni reigning Best Import Rondae Hollis-Jefferson ang game-winning dunk sa huling 37 segundo para gabayan sa pagbalikwas ang Tropang Giga matapos ang napurnadang 3-0 abante sa Game Three, 110-109.
Tumabo ng 23 points, 19 rebounds, 5 assists, 5 steals at 5 blocks si Hollis-Jefferson upang banderahan ang Tropang Giga na magkakakoon ng tsansang makaabante na sa best-of-seven finals bukas sa Game Five sa Antipolo.
Nag-ambag ng 15 markers at 11 rebounds si Rey Nambatac at may 15 points si Calvin Oftana
May siyam at walong puntos sina Jayson Castro at Poy Erram, ayon sa pagkakasunod, habang nagbalik si Kelly Williams mula sa calf injury upang magdagdag ng limang marka para sa mga bataan ni coach Chot Reyes.
Kontra sa Elasto Painters na determinadong makadalawang sunod na panalo upang maitabla ang serye, nahirapan ang Tropang Giga na kumawala agad at hindi nakalamang ng double digits sa buong laro.
Ganoon din ang ROS sa dikdikang laban tampok ang 10 deadlocks at siyam na lead changes hanggang sa makatabla sa 79-79 matapos ang and-one basket ni Santi Satillan sa huling 45 segundo.
Subalit mabilis na nakabawi ang TNT sa dakdak ni Hollis-Jefferson sa sumunod na posesyon.