Huling playoffs berth pakay ng Adamson sa CSB sa SSL
MANILA, Philippines — Pakay sikwatin ng Adamson University ang huling slot para sa Pool D playoffs berth kontra sa College of Saint Benilde sa 2024 Shakey’s Super League Collegiate Pre-season Championship na lalaruin sa Rizal Memorial Coliseum ngayong araw.
Magsisimula ang sagupaan sa alas-6 ng gabi kung saan nais ng Lady Falcons na samahan ang pool leader Far Eastern University na umusad sa susunod na round sa tournament na suportado ng Shakey’s Pizza Parlor, GCash, Chery Tiggo, F2 Logistics, Peri-Peri Charcoal Chicken, Potato Corner, R and B Milk Tea at Summit Water.
Malinis sa tatlong panalo ang Tamaraws, may 1-1 karta ang Lady Falcons habang 0-1 card ang Lady Blazers at 0-2 ang record ng San Sebastian College Recoletos.
Natisod ang Adamson sa huli nilang laro laban sa Lady Tamaraws 25-16, 22-25, 33-31, 20-25, 13-15 kahit tumikada ang kanilang kamador na si ace hitter Shaina Nitura noong Sabado.
Yumuko ang three-time NCAA champion, Saint Benilde sa unbeaten FEU (3-0), 17-25, 25-21, 16-25, 19-25, noong Oktubre 6.
Samantala, makakalaban ng Ateneo de Manila University ang laglag na rin na Emilio Aguinaldo College sa alas-3:30 ng hapon sa Pool A habang magkakaldagan ang parehong wala ng pag-asang umusad sa susunod na phase na Pool B teams na Lyceum of the Philippines University at University of Perpetual Help System Dalta sa ala-1 ng hapon.
- Latest
