Yulo markado sa Paris Olympics

MANILA, Philippines — Tiyak na tututukan ng ibang bansa si Filipino gymnast Carlos Edriel Yulo sa isang event sa 2024 Paris Olympics ito’y matapos maglabas ng prediksyon ang International Gymnast Online makaraang mag-uuwi ito ng gintong medalya sa World Cup.

Prediksyon ng IGO na malaki ang posibilidad na masungkit ng 24-anyos na si Yulo ang gold medal sa men’s floor exercises kontra defending Olympic champion Artem Dolgopyat ng Israel.

Ang IGO ay kilalang  international gymnastics e-zine at nangungunang sports magazine.

“If Carlos Yulo of the Philippines manages to be consistent, he could easily top the field on floor. Great Britan’s Luke Whitehouse should be a major factor on this event.” pahayag ng IGO sa website

Komento ng IGO, med­yo nahihirapan si Dolgo­pyat sa kanyang consistency kaya tingin nila ay masisilat siya ni Yulo.

“Defending champion Artem Dolgopyat from Israel has the difficulty and the consistency; hence, his presence on the podium at most major competitions.” ayon pa sa website ng IGO.

Markado rin ang pangalan ni Yulo sa men’s vault at ayon sa IGO puwedeng masikwat ng Pinoy ang silver medal habang ang prediksyon nila ay si Artur Davtyan ng Armenia ang mananalo ng gold medal.

Samantala, para sa forecast ng Sports Illustrated ay silver ang mai-uuwi ni Yulo sa men’s floor exercises.

Wala naman sa radar ng Sports Illustrated na makakakuha ng medalya si Yulo sa vault kung saan ay nasa listahan nilang mananalo si reigning world champion vaulter Jake Jarman ng Great Britain habang sina Nazar Chepurnyi ng Ukraine at Artur Davtyan ng Armenia ang mag-uuwi ng silver at bronze medals ayon sa pagkakasunod.

Nasisilip naman ng Sports Illustrated na makakakuha ng bronze si Filipino, Ernest John Obiena sa men’s pole vault habang ang pambato ng Sweden na si Armand Duplantis at United States bet Chris Nilsen ang sisikwat ng ginto at tanso.