NU, Letran swak sa SSL semis
MANILA, Philippines — Humakbang sa semifinals ang UAAP queens National University Lady Bulldogs matapos nilang walisin sa tatlong sets ang reigning CESAFI Champion, University of Southern Philippines Foundation Lady Panthers, 25-11, 25-12, 25-14 sa quarterfinals knockout ng 2024 Shakey’s Super League (SSL) National Invitationals na nilaro kahapon sa Ninoy Aquino Stadium.
Bumida sa opensa para sa Lady Bulldogs si Myrtle Escanlar matapos magtala ng siyam na puntos mula sa walong attacks at isang service ace, nahirang siyang Most Valuable Player (MVP) of the Game.
Maagang ipinakita ng Lady Bulldogs ang kanilang bangis matapos sakmalin ang panalo sa unang dalawang sets, simula pa lang ng palauan ay humarurot na agad sila sa opensa.
Sumampa sa quarters ang NU matapos nilang manguna sa Pool A tangan ang 2-0 karta at nakatapat nila ang No. 2 seed sa Pool C na Lady Panthers na may 1-1 card.
Makakalaban ng Lady Bulldogs sa semis ang Letran Lady Knights ngayong alas-2 ng hapon sa parehong venue matapos kalusin ng huli ang University of Batangas Lady Brahmans, 25-22, 25-18, 25-23 sa pangalawang laro.
No. 2 seed sa Pool D ang Letran na may 1-1 card habang 0-2 ang Lady Brahams sa Pool B sa event na suportado ng Shakey’s Pizza Parlor, Eurotel, Victory Liner at Mikasa.
- Latest
