MIAMI — Humataw si Kevin Durant ng 23 points, habang may 17 markers si guard Seth Curry para banderahan ang Brooklyn Nets sa 110-95 paggupo sa bumubulusok na Heat.
Nagdagdag si center Andre Drummond ng 13 points at 11 rebounds para sa Brooklyn (39-35) na nanatili sa No. 9 spot sa Eastern Conference.
May 11 at 10 markers naman sina guard Kyrie Irving at Nic Claxton, ayon sa pagkakasunod.
Umiskor si big man Bam Adebayo ng 14 points sa panig ng Miami (47-28) na nalasap ang ikaapat na sunod na kamalasan at nahulog sa No. 2 seat sa East sa ilalim ng No. 1 Philadelphia 76ers (46-27).
Nag-ambag sina Tyler Herro at Max Strus ng tig-13 markers at may 12 points si Kyle Lowry para sa Heat na ibinaon ng Nets sa 55-82 sa gitna ng third quarter.
Ang triple ni Curry ang nagtayo sa 94-57 kalamangan ng Brooklyn sa huling 4:02 minuto ng nasabing yugto.
Sa Memphis, tumipa si De’Anthony Melton ng 24 points at may 20 markers si Desmond Bane sa 127-102 pagpapak ng Grizzlies (52-23) sa nagdedepensang Milwaukee Bucks (46-28).
Sa Denver, humakot si Nikola Jokic ng 35 points sa 113-107 panalo ng Nuggets (44-31) sa Oklahoma City Thunder (21-53).
Sa Cleveland, kumamada si Zach LaVine ng 26 points, habang may 20 markers si DeMar DeRozan sa 98-94 pagtakas ng Chicago Bulls (43-31) sa Cavaliers (41-33).