Petron Blaze Spikers durog sa Taiwan Power

PHU LY, Vietnam -- Muling lumasap ng masaklap na pagkatalo ang Petron nang durugin ng Taiwan Power ng Chinese Taipei 25-20, 25-16, 25-9 sa quarterfinals ng 2015 AVC Asian Women’s Club Volleyball Championship Friday sa Ha Nam Competition Hall dito.

Hindi nakaporma ang Blaze Spikers sa labanang tumagal lamang ng isang oras at pitong minuto dahil nagpakitang-gilas ang national team ng Taiwan para makuha ang unang semifinal seat ng torneong qualifier ng FIVB World Women’s Club Championship na gagawin sa susunod na taon.

Tuluyan nang nasibak sa kontensiyon ang Petron at palaban na lamang para sa 5th hanggang 9th place.

Sunod na kalaban ng Blaze Spikers ang matatalo sa Kazakhstan at Japan sa classification match bukas.