MANILA, Philippines - Ang pinakahihintay na rematch sa pagitan ng mga college rivals na Ateneo at De La Salle para sa UAAP Season 77 women’s volleyball title ang magkakaroon ng preview sa sesyon ngayon ng Philippine Sportswriters Association (PSA) Forum sa Shakey’s Malate.
Inaasahang darating sina star player Alyssa Valdez at coach Anusorn ‘Tai’ Bundit para kumatawan sa defending champion Lady Eagles sa public sports program na maririnig ng live sa DZSR Sports Radio 918 at handog ng San Miguel Corp., Accel, Shakey’s at Philippine Amusement and Gaming Corp.
Ang Lady Spikers na nais mabawi ang titulong inagaw sa kanila ng kanilang long-time nemesis noong nakaraang season, ay kakatawanin ni athletic director Emmanuel Calanog at kapwa niya DLSU UAAP board member na si Edwin Reyes.
Hindi makakadalo ang mga La Salle players at si coach Ramil De Jesus dahil kasabay ng alas-10:30 ng umagang Forum ang kanilang practice.