SEABA Under 16 sweep ng Pinas

MANILA, Philippines - Ganap na dinomina ng Pilipinas ang Seaba Under-16 championships sa Indonesia matapos walisin ang kanilang apat na laro.

Ipinoste ng Nationals ang 84-44 panalo kontra sa Singapore para angkinin ang kampeonato noong Huwebes ng gabi.

Naipanalo ng koponan ang lahat ng apat nilang asignatura kasama na ang paglampaso sa Singapore para makamit ang tiket sa Fiba-Asia Under-16 championships sa Tehran, Iran.

Hinirang si Jose Lorenzo Mendoza bilang MVP.

Kaagad na kinuha ng youth cagers ni coach Jamike Jarin ang 33-12 kalamangan sa second quarter at hindi na nilingon pa ang Singapore.

Nauna nang binigo ng Filipinos ang Indonesia, 87-52, sa kanilang unang laban noong Lunes at itinakas ang isang 76-72 panalo laban sa Malaysia.

Nagtala naman ang Under-16 cagers ng isang 82-58 panalo kontra sa Thailand.

Nakatulong sa pagkumpleto sa pagwalis ng koponan sa torneo sina Michael Louise Dela Cruz at Kobe Paras, anak ni two-time PBA MVP Benjie Paras.