Dear Vanezza,
Gusto ko nang mag-graduate ng junior high school dahil matanda na ako tapos may senior high school pa. Gusto ko nang tumakas sa klase. Nahihiya na ako sa aking edad dahil ako na ang pinakamatanda sa klase. Pero hindi naman ako makapasa sa mga subjects ko. Ewan ko ba, kahit pilit akong mag-aral ay hindi ko maintindihan ang mga lessons ko. Pero kapag sports tulad ng basketball ay magaling ako. Hindi kasi ako magaling sa academics. Sana maintindihan ni nanay pati na rin ng mga teachers ko. – Joseph
Dear Joseph,
Pilitin mong tapusin ang iyong pag-aaral. Kung kailangang magpa-tutor sa mga teachers ay huwag kang matakot, mahiya, at mawalan ng loob. Magtiyaga ka lang sa pag-aaral para matapos ang high school. Huwag kang mag-alala sa iyong edad. Tiyak alam ng teachers mo ang gagawin sa iyong sitwasyon. Ang importante ay magpokus sa iyong studies. Pagdating sa senior high school ay may pupuwede namang pagpilian na angkop sa iyong kakayahan.
Sumasainyo,
Vanezza