Nobyo inaresto nawawalang UP Diliman employee; patay nang matagpuan

MANILA, Philippines — Bangkay na nang matagpuan ang isang 38-anyos na babae na nawawalang empleyado ng University of the Philippines (UP-Diliman) sa Tuba, Benguet.

Sa ulat ng pulisya, sinabing noong nakaraang Hunyo huling nakitang buhay ang biktimang si Irene Melican na kalaunan ay natagpuan din ang kaniyang sasakyan at ilang gamit gaya ng cell phone at credit card.

Noong Hulyo, inaresto ng mga tauhan ng National Bureau of Investigation-National Capital Region (NBI-NCR) ang nobyo ng biktima na lumilitaw na suspek sa pagkawala ni Melican.

Hanggang sa nakita na ang bangkay ni Melican sa Tuba, Benguet na walang saplot at nagtamo ng matinding pinsala sa katawan.

“The conduct was done with the Tuba, Benguet police, the DNA matched doon sa samples, reference materials taken from the parents of victim, Irene Melican. Nagkaroon kami ng closure na ito talaga ang taong hinahanap namin who was earlier kidnapped by her boyfriend,” ayon kay NBI-NCR Regional Director Ferdinand Lavin.

Ayon sa NBI, nakita umano ang suspek at biktima na magkasama sa sasakyan ni Melican noong Hunyo, at bumiyahe sa Agoo, La Union bago nagtungo sa Benguet.

Batay sa medico-legal report ng Philippine National Police at re-autopsy ng NBI sa mga labi ng biktima, naging malagim ang kaniyang pagkamatay.

“She died of traumatic blunt injuries to the chest and the neck. Further, NBI was able to establish that she had broken ribs to the left side of the body. She suffered a very painful death,” ani Lavin.

Ayon pa kay Lavin na patuloy ang kanilang imbestigasyon kung saan eksakto pinatay, at kung sinu-sino ang pumatay, ilang tao ang pumatay sa biktima.