Palibot sa CCSC gisugdan na paghawan

CEBU, Philippines — Gisugdan na sa Cebu City government ang paghawan sa palibot sa Cebu City Sports Center, ang main venue sa taliabot nga Palarong Pambansa 2024 sa sunod buwan.

Nag-una sa gipanghawan mao kining mga spaghetti wires ug mga posting wala nay gamit o sobra-sobra kaayo ang gipangtaud ilabi na kadtong mga nakaali sa agianan sa mga tawo diha sa aseras.

Niadtong adlaw nga Biyernes naghimo og ocular inspection si City councilor Jerry Guardo,  chairman sa Technical Infrastructure Committee ug bag-ohay lang gitudlo nga tig monitor sa Department of Engineering and Public Works.

Matud pa niya sa The Freeman, igsuong pamantalaan sa Banat News daghang mga poste nga wala nay gamit apan wala lang gihapon panangtanga sa mga telcos.

Sa pagkakaron, 15 na ka mga poste nga wala nay mga gamit ang ilang giibot , ang uban gisibog sa laing  lokasyon kay nakadisturbo sa agianan sa mga tawo.

“Naay electric pole from VECO, nikawat na gyud sa dan, I ordered it removed…Naa poy poste sa PLDT nya naa poy mga poste nga kahoy nga wala nay silbi, ang wire na lang ang nagkupot, we had it cleared and removed,” ni Guardo pa.

Samtang duna say mga poste nga kahoy nga gigamit pa gihapon apan tungod kay gabok na o ba kaha yungyong na kaayo og mga wires ang gipailisan og kongkretong mga poste ug gipasaka og maayo ang mga nagyungyong nga mga linya.

“Before there were redundant poles…nag-doble…When I checked, pwede ra e-attach sa usa ka poste…There’s no need for us to put up additional poles,” matud pang Guardo.

Diha palang sa may entrada sa CCSC, dunay tulo ka poste kaniadto nga karon gihimo nalang nga usa kay sobra-sobra ra kaayo. Gihimo sab ang Oplan Ratsada aron panangtangon ang mga spaghetti wires kay gawas nga hugaw tan-awon, peligro sab kini sa publiko.

Samtang dunay mga buhing linya sa kuryente nga napanit ang gipang-ayo og balik ug gipintalan ang luyong bahin sa CCSC aron limpyo tan-awon.

Si Guardo miingon nga magpadayon ang ilang pagsusi sa mga dagkong kadalanan sa siyudad duol sa  venue aron buhaton sab ang maong mga kausaban.