Cheetahs giusban ang Webmasters

CEBU, Philippines — Ang Benedicto College (BC) Cheetahs miparot og usab sa University of Cebu (UC) Webmasters, 67-64, pagsugod sa ikaduhang hugna sa Cebu Schools Athletic Foundation, Inc. (CESAFI) Season 26 basketball tournament niadtong Sabado, Oktubre 17, sa Cebu Coliseum.

Si Den Rick Orgong mikolekta og 17 puntos, lima ka rebounds ug tulo ka assists, samtang si Serge Gabines miposte og double-double nga 16 puntos ug 10 ka rebounds nga iyang gibuwak-buwakan og duha ka assists ug upat ka blocks sa dihang gipahugtan sa Cheetahs ang ilang pagkupot sa solong liderato sa college division uban ang 8-1 win-loss rekord.

Dako sab og naambag si Kenneth Babalcon bitbit ang 11 puntos, lima ka rebounds, duha ka assists, duha ka steals ug usa ka block alang sa Benedicto.

Si Ray Charles Libatog maoy nangu sa UC uban ang 18 puntos, lima ka rebounds ug usa ka assist. Si Jepherson Nonol mitali og 14 puntos, samtang si Ricofer Sordilla miamot og 11 puntos dili kini igo paglikay sa Webmasters gikan sa pagkatagak ngadto sa 5-4.

Sa laing collegiate matchup, ang University of Cebu Lapu-Lapu and Mandaue (UCLM) nakabawos sa University of the Philippines (UP) Cebu Fighting Maroons pinaagi sa 70-47 nga demolisyon.

Si John Gabriel Giganto mitimbre og 12 puntos, lima ka rebounds ug usa ka assist, samtang si Rafael Calo midonar og 10 puntos alang sa UCLM, nga mikulit sa ikaduha pa lamang nilang daog sa siyam ka duwa.

Sa juniors division, si Jhonrey Recio mipabuto og 21 puntos sa dihang ang five-peat champions Sacred Heart School-Ateneo de Cebu (SHS-AdC) Magis Eagles miinat sa perpekto nilang sinugdanan ngadto sa 5-0 uban ang 73-68 nga pagpayaka sa UC Junior Webmasters.

Gikan sa 68-68 nga panagtabla sa nahibiling 57.3 segundos, ang Magis Eagles mikadlit og lima ka sunod-sunod nga puntos aton tunolan ang Junior Webmasters ang ikaduha pa lamang niining pildi sa siyam ka duwa.

Sa laing mga resulta, si Vincent Zamora mihipos og 15 puntos, siyam ka rebounds, lima ka assists ug duha ka steals aron ibandera ang Cebu Institute of Technology-University (CIT-U) Junior Wildcats ngadto sa 80-70 nga pagpakaging sa San Carlos School of Cebu (SCSC) Warriors.

Samtang si Cedric Dela Rosa mipaulbo og double-double nga 34 puntos ug 12 ka rebounds, uban sa unom ka steals ug tulo ka blocks, aron ituboy ang Cebu Eastern College (CEC) Dragons ngadto sa 68-61 nga pagpatikangkang sa PAREF Springdale Titans.

Ang Junior Wildcats misaka sa ilang baraha ngadto sa 6-2, samtang ang Dragons mitabla sa ilang rekord ngadto sa 3-3.