Elasto Painters miangkon og luna sa quarterfinals

CEBU, Philippines — Ang Rain or Shine Elasto Painters nakaipsot sa Blackwater Bossing, 125-123, aron pagsilyo og luna sa playoffs sa PBA Season 50 Governors’ Cup niadtong Sabado sa gabii didto sa Ynares Center-Antipolo.

Ang mga batos ni coach Yeng Guiao madasigong mibangon human mabiyai og 11 puntos sa sayong bahin sa duwa. Milabaw pa sila og 13 puntos ug dayon nakasugakod sa mainit nga resbak sa Bossing aron pag-eskapon ngadto sa dos puntos nga kadaogan.

Duna pa untay tsansa nga modaog ang Blackwater apan si Sedrick Barefield nasipyat sa gitira niyang tres sa hilimatyong segundos.

Nakapaginhawa og lawom sa ROS human gilabni ni Aaron Fuller ang defensive rebound dayong kapupos sa oras.

Si Fuller maoy nangu sa ROS uban ang 24 puntos ug 19 ka rebounds. Si Caelan Tiongson mi-iskor og 22, si Adrian Nocum mitali og 20 samtang si Felix Lemetti midugang og 17 puntos.

Bitbit ang 5-3 rekord, ang Elasto Painters segurado nang moabante sa crossover quarterfinals bisag og aduna pa silang nahibiling duha ka duwa sa eliminasyon batk sa Magnolia Hotshots (6-3) ug Phoenix  Super LPG Fuel Masters (5-3).

Ang ikaupat ug katapusang luna sa playoffs sa ilang grupo ilogan sa Meralco (4-6), Ginebra (3-5) ug Blackwater (3-6).